اخر الاخبار

Post Top Ad

Your Ad Spot

الأحد، 17 مارس 2019

ازاي تعمل عمرة وتكون صحيحة وربنا يتقبلها منك وخطوة بخطوة








يقدم لكم موقعكم المتميز العاصمة وبخاصة لمتابعية من مصر العديد من الخدمات التي قد يبحث عنها الكثير على الشبكة العنكبوتية لساعات طويلة ويخرج في نهاية المطاف صفر اليدين لذلك نوفر لك متابعنا العزيز هذه الخدمات عبر موقعنا ونسهل عليك في الوصول اليها واليوم نقدم لك ازاي تعمل عمرة وتكون صحيحة وربنا يتقبلها منك وخطوة بخطوة   .


بسم الله الرحمن الرحيم
هنتكلم ان شاء الله النهارده عن ازاي تعمل عمرة وتكون صحيحة وربنا يتقبلها منك وخطوة بخطوة
اولا
الادوات المطلوبة معاك وانت في العمرة بس
1 - الاحرام وده ب50 ريال من اي مكان وعبارة عن 2 بشكير كل قطعه لوحدها
2 - حزام عشان تربطه علي وسطك وبيكون لونه ابيض وب15 ريال
3 - جراب عشان تضع فيه متعلقاتك الشخصية (المحفظة - الموبايل ) وده ب15 ريال
الادوات المطلوبة معاك بقي وانت خارج من بيتك متجه للعمرة والرجوع منها
1 - طقم داخلي نظيف
2- صابونة
3- مزيل للعرق ريكسونا او بخاخة زي ما تحب
4 - جلابية وسروال
ملاحظة : ممكن تلاقي الاحرام والحزام والجراب في مكان الميقات 24 ساعه شغال متقلقش من الحته دي
ثانيا
اركان العمرة : الاحرام - الطواف - الصلاة خلف مقام ابراهيم - السعي بين الصفا والمروة - الحلق او التقصير
ثالثا
المصطلحات
(1)الاحرام :
معناه انك هتحرم يعني تمسك نفسك عن كل حاجة "حلاقة الشعر / قص الاظافر / حلاقة الابط والعانة/ العلاقة الزوجية" ومفيش لبس ملابس داخلية او اي حاجة الاحرام وبس اللي قولنا عليه بالنسبة للمرآة غير الرجل وده مقطع فيديو يشرح لك ازاي تلبسه
https://www.youtube.com/watch?v=JUMZZhlU7SM
(2)الميقات :
ده المكان اللي بتحرم منه وتنوي انك تعمل العمرة وطبعا احنا اهل السعودية كلنا بنحرم من مكان اسمه مقيات السيل الكبير (مقيات قرن المنازل) واهل اليمن لهم ميقات واهل مصر وهكذا
البداية :
هتسال حد من اللي معاك في السكن تقوله انا عاوز مكان الحمله اللي بتطلع عمرة
تروح المكتب بتاع السفريات او الحمله وتقوله انا عاوز احجز هو غالبا بيكون يوم الخميس الساعه 2 ظهرا لحد يوم السبت بالليل ده لو مكة والمدينة مع بعض وسعرها بيكون غالبا ب150 ريال وعلي حسب المنطقة بتاعتك انت ال150 ريال كانوا من عندي
مهم جدا : قبل ما تسافر تحلق شعر الابط والعانة وتقص اظافرك وسيب شعرك انك كده كده هتقصه ان تحلقه لما تخلص العمرة
هتروح قبل موعدك عشان تلحق تركب قدام وتحجز قدام ابعد عن ورا اوعي تركب في الكرسي الاخير
السواق بطبيعه الحال لو المكان بعيد هيقف في استراحة كل 200 كيلو مثلا او علي حسب السواق والطريق هتنزل الاستراحة تصلي العصر قصر او الصلاة اللي فاتتك وهتلاقي في الاستراحة
تموينات (سوبر ماركت ) هتلاقي الحاجات اللي عاوز تاكلها وهتلاقي البوفيه (الكافيه) فيه شاي وشاي بلبن لو عاوز حاجة سخنة وممكن تلاقي مطعم لو جعان وعاوز تاكل كل بس خالي بالك خفف في اكلك عشان توصل خفيف عشان تبقي بطنك مش توجعك وكل شوية تدخل الحمام لازم تبقي علي طهارة من بعد الاحرام
هتوصل الميقات (2) هتروح اي حمام هناك وتدخل وتغتسل كغسل الجنابة طبعا هتكون انت حلقت وضبط يدوب بس هتغتسل وتحط برفان ومزيل العرق وتسرح شعرك كويس لانك وقت ما لبست الاحرم ممنوع تعمل او تحط او تقص شعرك او تعمل اي حاجة وتجيب معاك فزلين عشان التسلخات لو انت مليان شوية
طبعا هتقلع الداخلي وتلبس الاحرام زي الفيديو السابق وتربط حزامك وتلبس الجراب وتضع فيه موبايلك ومحفظتك حولين وسطك وتروح المسجد تصلي ركعتين سنة بس
ولما تركب الباص بقي تقول "لبيك اللهم عمرة" وتقول الدعاء ده "حبسني حابس فمحلي حيث حبستني "
وتبدا تقول بقي طول ما انت ماشي لحد ما توصل "لبيك اللهم لبيك...لبيك لا شريك لك لبيك ان الحمد والنعمة لك والملك لا شريك لك " وهكذا طول الطريق
كده انت علي بعد 75 كيلو من مكة
هتوصل في الفندق اللي تبع الحملة بالسلامة لو عاوز تدخل الحمام وتضبط احرامك وتتوضي بس اوعي تغسل بصابونة فيها ريحة حرام بعد كده هتنزل بقي تروح الحرم
هتوصل الحرم " يستحسن يبقي معاك كتيب صغير تقرا منه الادعية او مصحف "
وده اول ركن تاللي هو الطواف شوف مكان الحجر الاسود فيه لان الطواف بيبتدئ من عنده ولما تشوفه ترفع ايديك وتقول بسم الله ... الله اكبر
تدخل علي الطواف ولازم يكون في الاحرام بتاعك ظاهر منه كتفك اليمين في اول ثلاث اشواط وده اسمه الاضطلاع وهتلاقيه في الفيديو
تلف 7 مرات كل مرة تيجي عن الحجر الاسود ترفع ايديك وتقول بسم الله ... الله اكبر لو قدرت توصل له وتستلمه وتبوسه كان افضل ان تيسر لك الامر وطبعا خلال الطواف تدعي باللي في نفسك وتقرا قران وتقول "ربنا اتنا في الدنيا حسنة وفي الاخرة حسنة وقينا عذاب النار"
خلصت 7 اشواط تروح خلف مقام ابراهيم وتصلي خلف ركعتين اول ركعه بسورة الكافرون "قل يا آيها الكافرون ...." تاني ركعة بسورة الاخلاص "قل هو الله احد...." وان لم يتسر لك انك تصليهم خلف المقام صلي في اي مكان
تروح عند الصفا والمروة وتقرأ هذه الآيه
"إِنَّ الصَّفَا وَالْمَرْوَةَ مِن شَعَآئِرِ اللّهِ فَمَنْ حَجَّ الْبَيْتَ أَوِ اعْتَمَرَ فَلاَ جُنَاحَ عَلَيْهِ أَن يَطَّوَّفَ بِهِمَا وَمَن تَطَوَّعَ خَيْراً فَإِنَّ اللّهَ شَاكِرٌ عَلِيمٌ"
7 اشواط تبتدئ بالصفا وتختم بالمروة وفي النص هتلاقي علامة خضرا وضوء اخضر ده للهرولة تجري شوية بين العلامتين دول اقتداء بالسيدة هاجر ام اسماعيل عليهما الصلاة والسلام
لما تخلص شوط هتقف في مكان ومتجه الي القبلة وتقول الدعاء ده 3 مرات "لا اله الا الله وحده لا شريك له . له الملك وله الحمد وهو علي كل شئ قدير . لا اله الا الله وحده انجز وعده ونصبر عبده وهزم الاحزاب وحده " وتدعي بما تشاء في السعي كذلك
في خلال الطواف او السعي لو فيه صلاة فريضة ممكن تصليها زي ما انت واقف وترجع تكمل عادي
كده انت الحمد لله خلصت 3 اركان العمرة فاضل بس ان تحلق شعرك
هتخلص ولو حابب تصلي او تشرب مياه زمزم ودي في كل مكان علي قد ما تقدر تشرب اشرب وانت في السعي هتلاقي مياه كتير اشرب في كل شوط دي مياه زمزم سم بالله وادعي بما تشاء
هتطلع بره الحرم هتلاقي ناس تقولك عاوز تقص شعرك او تحلقه
لو حلقت تحلق خالص بالموس او بالمكاينه او تقص شعرك
الرسول دعاء للمحلقين ثلاث مرات بالاستغفار ودعاء للمقصرين مرة واحدة
كده انت تحللت تقدر تعمل اللي انت عاوزة بعد كده
طبعا الصلاة في الحرم بتعادل 100 الف صلاة فمتضعيش وقتك في النوم او التسوق دي فرصة
كده انت خلصت العمرة هتروح بعد كده علي المدينة تاني يوم الفجر هتوصل علي 11 صباحا
هتدخل الحرم النبوي تصلي الظهر فيه وتخلص تروح تسال علي مكان الروضة الشريفة وتصلي هناك ركعتين وتروح عند قبر النبي "صل الله عليه وسلم" تسلم عليه فقط ولا تطلب منه مسالة او الشفاعه
تقول السلام عليك يا رسول والله وهتلاقي جمبه قبر سيدنا ابو بكر وقبر عمر بن الخطاب تسلم عليهم
السلام عليك يا ابا بكر السلام عليك يا عمر
كده انت خلصت الحملة هترجع بالسلامة مدينتك وحمد لله علي السلامة
العمرة انك تتغير
يعني لو كنت مسئ تتغير للاحسن
لو كنت احسن تتغير لاحسن الاحسن
وعمرة مقبولة وتتقبل الله منا ومنكم صالح الاعمال
انا اسف جدا علي الاطالة يارب اكون لميت بكل حاجة وان كان هناك خطأ او سهو فهو مني او من الشيطان فسامحوني
ارجو الرجوع الي اي كتيب قبل المغادرة للقراءة حتي لاكون سبب للخطا في العمرة
لو فيه حاجة ناقصة مفيش مشكلة اني اعدلها وجزاكم الله كل خير

لا تسنونا من صالح دعائكم تقبل الله منا ومنكم صالح الاعمال

ليست هناك تعليقات:

إرسال تعليق

مرحبا بك

Post Top Ad

Your Ad Spot

اقرأ المزيد